"20 Yanvar" metrostansiyası - Binəqədi yolu marşrutu üzrə hərəkət edən 142 nömrəli avtobusu saatlarla gözləyirik. Avtobus gələndə isə o qədər dolu olur ki, minə bilmirik".
Bunu Bakuplus.az -a həmin marşrutdan hər gün istifadə edən sərnişinlər deyiblər.
Onların sözlərinə görə, dolu olduğuna görə bəzən sürücülər avtobusu dayanacaqlarda ümumiyyətlə saxlamırlar.
Sərnişinlər deyirlər ki, sürücülərə mövcud problemlə bağlı irad bildirdikdə onlar "hara istəyirisiniz, gedin, şikayət edin" cavabını alırlar.
Şikayətçilər qeyd edir ki, məsələ ilə bağlı müvafiq qurumları da məlumatlandırıblar, ancaq heç bir nəticəsi olmayıb.
Məsələ ilə bağlı Azərbaycan Yerüstü Nəqliyyat Agentliyindən bildirilib ki, sərnişin tələbatına uyğun olaraq 142 nömrəli marşrutda avtobuslar 10-12 dəqiqə hərəkət intervalı ilə fəaliyyət göstərir: "Marşrutun keçdiyi küçə və prospektlərdə, xüsusən günün pik saatlarında müşahidə edilən nəqliyyat sıxlığı avtobuslararası intervala da təsir göstərir. Buna baxmayaraq daşıyıcıya xəttin nizamlı fəaliyyətin təmin edilməsi və sərnişin tələbatına uyğun olaraq xəttə əlavə nəqliyyat vasitələrinin cəlb olunması barədə tapşırıq verilib. Qeyd edək ki, hazırda 142 nömrəli marşrut xətti müsabiqəyə təqdim olunub".
