Bu gün Bakı Ağır Cinayətlər Məhkəməsində hakim Elmin Rüstəmovun sədrliyi ilə paytaxtda qardaşı oğlu Yasin İbadovu qətlə yetirməkdə təqsirləndirilən Babək İbadovun cinayət işi üzrə məhkəmə prosesi keçirilib.
Lent.az xəbər verir ki, məhkəmə zərərçəkənin hüquqi varisinin ifadəsi ilə davam edib.
Zərərçəkənin hüquqi varisi İradə Salmanova (ad şərtidir) təqsirləndirilən şəxsdən şikayətçi olmadığını bildirib.
O deyib ki, Yasin Mingəçevirdə qiyabi təhsil alıb. Tətil üçün evə gələcəkdi, amma gəlib çıxmayıb. Belə ki, Yasin daha sonra Türkiyəyə gedib. İradə ağlaya-ağlaya qayınlarına zəng eləyərək Yasinin evə gəlmədiyini deyib. Əmiləri mərhum şəxsin ardınca Türkiyəyə gedib. Ancaq Yasin onlarla gəlmək istəmədiyini deyib. Mərhumun anasının sözlərinə görə, hadisənin necə baş verdiyini görməyib və oğlunun ölümündən hadisənin səhəri gün xəbər tutub. O bildirib ki, qaynından şikayətçi deyil və onu bağışlayıb.
Məhkəmə İradə Salmanovanın ilkin istintaq zamanı verdiyi ifadəsini elan edib.
Mərhumun anası vurğulayıb ki, oğlu Yasin cinsi azlıq nümayəndısi olub və onun bu hərəkətləri ailədə ona qarşı nifrət yaradıb. O, qaynı Babəkin müharibə iştirakçısı olduğunu və qardaşı oğlunun cinsi azlıq olduğunu qəbul edə bilmədiyini deyib.
Növbəti prosesi martın 4-nə təyin olunub.
Xatırladaq ki, hadisə 2025-ci ilin 6 noyabr tarixində Səbail rayonu, Bəşir Səfəroğlu küçəsində qeydə alınıb.
2006-cı il təvəllüdlü Yasin Seymur oğlu İbadov bıçaqlanaraq öldürülüb. Polis əməkdaşlarının keçirdiyi əməliyyat tədbirləri nəticəsində hadisəni törətməkdə şübhəli bilinən mərhumun əmisi, 38 yaşlı Babək İbadov tutulub.
Qətlə yetirilən Yasin İbadovun LGBT nümayəndəsi olduğu bildirilir. O, "Rüzgar" ləqəbi ilə tanınırmış.
Faktla bağlı Nəsimi rayon Prokurorluğunda cinayət işi başlanıb, Babək İbadova Cinayət Məcəlləsinin müvafiq maddələri ilə ittiham irəli sürülüb.
