Azərbaycanda keçiriləcək “COP29”-un idarə heyətinin sədri məlum olub. Bu haqda bu gün, 22 yanvar tarixində Bakuplus.az Report-a istinadən xəbər verir.
Nərmin Carçalova “COP29” Azərbaycan Əməliyyat Şirkətinin idarə heyətinin sədri vəzifəsinə təyin olunub. O, Heydər Əliyev Fondunun ətraf mühitin mühafizəsi və iqlim fəaliyyəti üzrə layihələrinin rəhbəridir.
N.Carçalova Azərbaycan Dillər Universitetində bakalavr dərəcəsi üzrə təhsil alıb, ADA Universitetinin Diplomatiya və beynəlxalq münasibətlər üzrə magistr proqramını bitirib. Daha sonra Harvard Kennedi Məktəbinin İctimai liderlik üzrə ixtisasartırma proqramını, London Universitet Kollecinin (UCL) Dövlət idarəetməsi üzrə magistr proqramını bitirib.
2013-cü ildən Heydər Əliyev Mərkəzində Beynəlxalq əlaqələr şöbəsində, eləcə də Heydər Əliyev Fondunda ətraf mühitin mühafizəsi və iqlim fəaliyyəti üzrə layihələrin rəhbəri və Azərbaycan Respublikası Prezidentinin Administrasiyasında müxtəlif vəzifələrdə işləyib. Birləşmiş Ərəb Əmirliklərində keçirilən “COP28”-də Azərbaycan pavilyonunun layihə meneceri olub.
