Dənizkənarı Bulvar İdarəsinin Su İdman Sarayına gedən yolu qanunsuz qazdığı və ərazidə şlaqbaum qoyulacağı barədə məlumat yayılıb. Bu haqda bu gün, 20 dekabr tarixində Bakuplus.az Baku TV-yə istinadən məlumat verir.
Ərazidə yaşayan sakinlər öz narazılıqlarını bildiriblər. Onların sözlərinə görə, hər dəfə mənzilbaşına gedərkən onlar həmin şlaqbaumu keçməyə və pul ödəməyə məcbur olacaqlar.
Özünü Dənizkənarı Bulvar İdarəsinin rəsmisi kimi təqdim edən şəxs bildirib ki, görülən işlər qanunidir və bulvarın ərazisində aparılır.
Hadisə yerinə cəlb olunan Avtomobil Yollarının Mühafizə Xidmətinin rəsmisi həmin işlərin aparılmasının qeyri-qanuni olduğunu təsdiq edərək qazıntıları dayandırıb.
Məsələ ilə bağlı Su İdman Sarayının rəhbərliyi də narazıdır.
“Su İdman Sarayı ərazisində hazırda 1000 parkinq yeri müştərilərimiz üçün təmənnasızdır. Bu ərazidə parkinqin olması o deməkdir ki, Su İdman Sarayına gələn hər bir şəxs ödəniş etməlidir. Halbuki biz heç bir müştəridən parkinq üçün ödəniş tələb etmirik”, – deyə sarayın direktor müavini Novruz Novruzov bildirib.
Məsələ ilə bağlı Dənizkənarı Bulvar İdarəsinin mətbuat katibi Əfsanə Mehdiyeva qeyd edib ki, sözügedən ərazi Dənizkənarı Bulvar İdarəsinə, eyni zamanda onun sanitar-mahafizə zonasına aiddir. Dənizkənarı Milli Park haqqında əsasnaməyə əsasən, Dənizkənarı Bulvar İdarəsinin milli parkın fəaliyyatinə ümumi rəhbərliyi və nəzarəti həyata keçirmək, habelə ərazidə xüsusi mühafizə rejimini təmin etmək üzrə müstəsna səlahiyyətləri var. Xüsusi mühafizə olunan təbiət əraziləri, qoruqlar, milli parklarda xüsusi mühafizə rejiminin müəyyənləşdirilməsi qanunvericiliklə yol veriləndir.
“O ərazidən keçib evinə gedən insanlara gəlincə onlar üçün heç bir problem yaranmayacaq”, – deyə bulvarın rəsmisi vəd edib.
Azərbaycan Avtomobil Yolları Dövlət Agentliyindən (AAYDA) isə bildirildi ki, sözügedən ərazi ümumi istifadədə olan yoldur və həmin yolda hər hansı işin aparılması ilə bağlı mütləq şəkildə rəsmi qaydada müraciət olunmalıdır.
