24 iyun Azərbaycanın Milli Qəhrəmanı Əlif Hacıyevin doğum günüdür.
Əlif Hacıyev 1953-cü ildə Xocalı şəhərində doğulub. O, ailənin üçüncü övladı idi. Əlif uşaqlıqdan çörək qazanardı və balıq tutardı.
1970-ci ildə məktəbi bitirərək, Xankəndi şəhərində sürücülük peşəsinə yiyələnib. 1971-ci ildə ordu sıralarına çağırılıb. Hərbi xidməti Minsk şəhərində keçib. 1973-cü ildə ordudan tərxis olunaraq, Xankəndi Avtonəqliyyat Müəssisəsində sürücü işləyib. 1974–1984-cü illərdə Belorusiya DİN-nin və Azərbaycan SSR Dağlıq Qarabağ Muxtar Vilayətinin (DQMV) daxili işlər orqanlarında müxtəlif vəzifələrdə çalışıb. 1976-cı ildə SSRİ DİN-nin Frunze adına Xüsusi Orta Milis məktəbinə daxil olub. 1979-cu ildə həmin məktəbi bitirib, 1981-ci ildən təhsilini SSRİ DİN-nin Akademiyasında davam etdirib.
DQMV-də işləyərkən uzun müddət fəaliyyət göstərən erməni gizli millətçi mərkəzini ifşa etməyə çalışıb. Buna görə də erməni millətçiləri onun sırıqlısının cibinə saxta pul qoyublar. Əməliyyat qrupu təşkil edilib və Əlif öz kabinetində həbs olunub. Cəzasını çəkmək üçün Rusiyanın Nijni Tagil şəhərinə göndərilib. 1987-ci ildə onun işinə yenidən baxılıb, 10 il həbs cəzası 6 ilə endirilib. O, 1989-cu ilin fevral ayının 20-də əfv olunaraq azadlığa çıxıb.
Əlif Hacıyev 1990-cı ildə Xocalıya qayıdıb və Dağlıq Qarabağ üzrə Təşkilat Komitəsində, Qarabağa Xalq Yardımı Komitəsində fəaliyyət göstərərək erməni millətçilərinə qarşı mübarizəsini yenidən davam etdirib. 1990-cı ilin dekabr ayında daxili işlər orqanlarına yenidən bərpa olunub və Xocalı hava limanı xətt daxili işlər bölməsinə rəis təyin edilib. Eyni zamanda Xocalı hava limanının komendantı olub. Gördüyü işlərinə görə 1991-ci ilin dekabr ayında ona mayor rütbəsi verilib.
1992-ci ilin fevralın 25-də Əlif Hacıyev və onun dəstəsi səhər saat beşə qədər düşmənə ciddi müqavimət göstərbilər. Amma döyüşlər qeyri-bərabər qüvvələr arasında gedib. Əlif Hacıyev isə yenə gücünə, adamların etibarına və etimadına inanıb geri çəkilməyib. İlk növbədə dinc əhalini nisbətən təhlükəsiz yerə çatdırmağa cəhd göstərib. Qanlı döyüş gecəsində adamların bir hissəsini Ağdamın Şelli kəndinə çatdıra bilib. Amma hələ də təhlükədə xeyli adam vardı və bu adamlar Əlif Hacıyevin yolunu gözləyirdi. Belə məqamda Hacıyev bir an belə dinclik tapmırdı, qətiyyətlə yenidən geriyə döndü. Avtomatın darağını dəyişərkən erməni gülləsi Əlif Hacıyevin qəlbinə sancılıb.
Onun cəsədi Xocalıda 5 gün böyürtkən kolunun dibində qalıb. 5 gündən sonra onun Nazim adlı işçisi cəsədi gizli şəkildə Azərbaycan tərəfə keçirə bilib.
Əlif Hacıyev Bakının Şəhidlər xiyabanında dəfn edilib.
Bakının Nizami rayonundakı küçələrdən biri onun adını daşıyır. Haqqında "Əlif. Xocalı" adlı sənədli film çəkilib.
Azərbaycan Respublikası Prezidentinin 6 iyun 1992-ci il tarixli 831 saylı fərmanı ilə mayor Əlif Lətif oğlu Hacıyev ölümündən sonra "Azərbaycanın Milli Qəhrəmanı" adına layiq görülüb.
