Aparıcı Zamirə Dadaşova Həsən Əliyev küçəsində yerləşən "İtaliano Parati" mağazasından aldığı divar kağızları ilə bağlı ciddi iddialar səsləndirib.
Bakuplus.az xəbər verir ki, onun sözlərinə görə, mağazadan ümumi dəyəri 2300 manat olan divar kağızları alıb. Satıcı məhsulun xarici istehsal olduğunu və keyfiyyətinə zəmanət verildiyini desə də, sonradan divar kağızlarından birinin yerli istehsal olduğu və vurulduqdan sonra rəngində qaralma yarandığı məlum olub. Şikayətçi bildirir ki, mağaza əvvəlcə problemi qəbul edərək divar kağızlarının dəyişdiriləcəyini vəd edib, hətta bunu təsdiqləyən səsli mesajların da olduğunu iddia edir.
Vətəndaşın sözlərinə görə, iyulun 16-da mağazanın göndərdiyi ustalar evə gələrək köhnə divar kağızlarını söküblər. Lakin söküntüdən sonra yeni divar kağızı vurulmayacağını bildirərək mənzili tərk ediblər. Şikayətçi iddia edir ki, mağaza nümayəndələri kobud davranıb, əvvəl verdikləri vədləri inkar ediblər və "Gedib kimə istəyirsiniz şikayət edin" deyiblər.
O, həmçinin bildirib ki, 2300 manatlıq alış-verişə baxmayaraq, ona kassa çeki təqdim edilməyib, yalnız qaimə verilib. Vətəndaş məsələ ilə bağlı aidiyyəti dövlət qurumlarına müraciət etdiyini, dəymiş maddi ziyanın ödənilməsini və mağaza barəsində araşdırma aparılmasını xahiş etdiyini bildirib.
"İtaliano Parati" mağazası barəsində səsləndirilən iddialara münasibət bildirib.
Mağazanın açıqlamasında qeyd olunub ki, müştərinin aldığı "Mister Dekor" markalı divar kağızı Azərbaycan istehsalıdır və bu barədə alış zamanı ətraflı məlumat verilib. Bildirilib ki, məhsulun keyfiyyəti ilə bağlı indiyədək heç bir şikayət daxil olmayıb.
Şirkətin iddiasına görə, mənzildə aparılan baxış zamanı divar kağızlarında yaranan ləkələrin səbəbinin məhsulun keyfiyyəti deyil, divarların tam qurudulmaması, kifayət qədər havalandırmanın təmin edilməməsi və tətbiq texnologiyasına düzgün əməl olunmaması olduğu müəyyən edilib. Bu qənaəti "Mister Dekor" MMC-nin mütəxəssislərinin də təsdiqlədiyi vurğulanıb.
Açıqlamada həmçinin bildirilib ki, istifadə olunmamış divar kağızlarını geri qəbul etməyə hazır olduqları barədə müştəriyə məlumat verilib. Şirkət yayılan iddiaların həqiqətə uyğun olmadığını qeyd edərək, işgüzar nüfuzuna xələl gətirən məlumatlarla bağlı qanunvericiliyə uyğun tədbirlər görəcəyini və zərurət yaranacağı təqdirdə məhkəməyə müraciət edəcəyini açıqlayıb.
Bundan əlavə, "İtaliano Parati" mübahisə predmetinə çevrilən divar kağızlarının istənilən müstəqil mütəxəssis tərəfindən ekspertizadan keçirilməsinə hazır olduqlarını bəyan edib.
