Bakının Qaradağ rayonunda 1997-ci il təvəllüdlü Vəfadar ailə münaqişəsi zəminində anası Südabəyə (adlar şərtidir) xəsarət yetirib. Hadisə Ələt qəsəbəsində baş verib. Mübahisə zamanı Vəfadar anasının sol göz nahiyəsinə yumruqla, baş nahiyəsinə isə qənd qabı ilə vurub.
Demokrat.az xəbər verir ki, ana ilə oğul arasında münasibətlər Vəfadarın evlənmək istəməsi, lakin heç bir yerdə işləməməsi səbəbindən yaranan mübahisələrdən sonra pisləşib. Südabənin sözlərinə görə, oğlu təxminən bir ay əvvəl ona ailə qurmaq istədiyini bildirib. Ana isə oğluna heç bir yerdə işləmədiyini, əvvəlcə iş tapmalı olduğunu deyib. Hadisə günü də bu səbəbdən tərəflər arasında mübahisə düşüb.
Vəfadar Cinayət Məcəlləsinin 128-ci maddəsi ilə təqsirləndirilib və özünü günahkar bilib. Zərərçəkmiş Südabə isə hazırda oğlu ilə barışdığını və ona qarşı şikayətinin olmadığını bildirib.
Qaradağ Rayon Məhkəməsinin hökmü ilə Vəfadar 6 ay müddətinə azadlığın məhdudlaşdırılması cəzasına məhkum edilib və ona elektron nəzarət vasitəsi tətbiq olunub.
