Fazil Mustafaya qarşı sui-qəsdlə bağlı məhkəmə davam edir. Bu haqda bu gün, 23 yanvar tarixində Bakuplus.az APA-ya istinadən xəbər verir.
Emin Əliyarov, Rəşad Əhmədov, Azər Səricanov, Elşad Əsgərov, Səbuhi Şirinovun cinayət işi üzrə məhkəmənin ilk baxış iclası keçirilib.
Bildirilir ki, sözügedən şəxslər Fazil Mustafanı dini baxışlarına görə cəzalandırmaq istəyiblər. Buna görə də onlar İranın “Hüseyniyyun” qruplaşması ilə əlaqə qurublar və onlardan 30.000 ABŞ dolları götürüblər, daha sonra “Kalaşnikov” markalı silah əldə ediblər.
“Dövlət xadimi olmur, lap kim olursa, olsun. Aşura gününü qeyd edənlər haqqında “hürürlər, mələşirlər” ifadəsini işlətmək nə deməkdir? 2019-cu ildən bu adamın dedikləri, yazdıqları məni narahat edirdi. Qarabağ müharibəsində şəhidlərlə bağlı səslənən fikirlər lap ağ oldu. Nə deməkdir ki, “kişi ağlamaz”?!” - deyə Azər Səricanov ifadəsində vurğulayıb.
Təqsirləndirilən şəxslər öncə Fazil Mustafanın yaşadığı evi müşahidə ediblər, onu sosial şəbəkədə izləyərək material toplayıblar.
Bundan əlavə, həmin şəxslər Azərbaycanın müxtəlif ünvanlarda olan hərbi təyinatlı obyektlər barədə məlumatları İran tərəfinə ötürməkdə ittiham olunurlar.
Azər Səricanov ifadəsində qeyd edib ki, məqsədləri Fazil Mustafanı öldürmək olmayıb, onu cəzalandırmaq istəyiblər:
“Onun çiyninə dəyən güllə başına dəyə bilərdi. Elə olmamağının səbəbi budur ki, onu öldürmək yox, cəzalandırmaq istəmişik”, - deyə o, əlavə edib.
Həmçinin o, cinayətin İrandan gələn sifarişlə törədilməsi və 30.000 ABŞ dolları alması barədə ittihamı qəbul etməyib.
Məhkəmənin növbəti baxış iclası 16 fevral tarixində keçiriləcək.
