Bakının Xətai rayonu, Gəncə prospektində insanların rahat hərəkət etməsi üçün pilləkənlər quraşdırılıb. Ancaq pilləkənlərin indiki vəziyyəti olduqca bərbaddır. Bu pilləkənlərdən düşmək belə indiki vəziyyətdə çətinlik yaradır. Küləkli, yağışlı havalarda isə bu, demək olar ki, mümkün deyil. Hətta yaşlı insanların rahat hərəkət etməsi üçün pilləkənlərin kənarına quraşdırılan tutacaq məhəccərlər dağılır. Bu haqda bu gün, 16 dekabr tarixində Bakuplus.az ATV-yə istinadən məlumat verir.
Sakinlərin sözlərinə görə, problem neçə ildir ki, mövcuddur. Aidiyyəti qurumlara müraciət olunsa da, heç bir fayda olmayıb.
Yaxın ərazidə 191 saylı tam orta məktəb yerləşir. Bu yoldan məktəblilər daha çox istifadə edirlər. Pilləkənin kənarında tutacaq məhəccərlərdən əlavə, heç bir təhlükəsizlik tədbirləri görülməyib. Yağışlı havada və ya qarda kiminsə ayağı buradan sürüşsə, bədbəxt hadisə qaçılmaz olacaq.
Məsələ ilə bağlı Xətai Rayon İcra Hakimiyyətindən bildirildi ki, mövcud problemlə bağlı aidiyyəti qurumlara müxtəlif vaxtlarda rəsmi qaydada müraciət edilib. Müvafiq rəy verildikdən sonra, ərazidə təmir-bərpa işləri aparılacaq.
