Ötən gün sosial şəbəkələrdə Bakıda lentə alınan qırmızı “VAZ” markalı avtomobil gündəmə gəlib. Avtomobil sahibi Türkiyənin yardım aksiyasına qatılaraq yorğan, döşək və digər ləvazimatları daşıdığı üçün ictimaiyyətin böyük marağına səbəb olub.
Həmin şəxsin Sərvər Bəşirli olduğu ortaya çıxıb. O, bu yardımı etməyə borclu olduğunu bildirib. Bu haqda bu gün, 9 fevral tarixində Bakuplus.az Medianews-a istinadən məlumat verir.
“Bizim də 1992-ci ildə belə qarlı, çovğunlu hadisələrimiz olub. Qardaş ölkənin də başına gələn bu təbii fəlakətə görə əlimizdən gələn köməkliyi elədik. Gözləmirdim ki, bu fotom gündəm olar və hər kəsin axtardığı şəxsə çevrilərəm. Avtomobilin üstündəki yükləri əmim, dayım, nənəmgil, laçınlıların məskunlaşdığı yataqxanda yaşayan şəxslər yığıblar. Mən ancaq TikTok sosial platformasında varam, oradakı rəyləri oxuyuram. Türkiyə bayrağını da maşından asmaq öz ideyam idi. Növbəti dəfə də yardım aparacağıq”, - deyə Sərvər Bəşirli bildirib.
Sərvər Bəşirli 1989-cu ildə Laçın rayonunun Minkənd kəndində anadan olub. Hazırda Abşeron rayonu, Ceyranbatan qəsəbəsində fərdi evdə yaşayır.
