1901-ci ildə Hacı Zeynalabdin Tağıyev tərəfindən tikilən Bakı toxuculuq kombinatı bizim günlərdə uçub dağılır. Ərazisi isə sexlərin icarəsinə verilib. Bu haqda ATV News reportaj hazırlayıb.
Paytaxtın Xətai rayonunda yerləşən 121 illik tarixə malik bina indi yararsız hala düşüb, fasadın bir hissəsi uçub, pəncərələri sındırılıb. Keçmiş vaxtları yalnız girişdə asılan Hacı Zeynalabdin Tağıyevin portreti xatırladır.
1980-ci illərdə kombinatda partiya katibi vəzifəsində işləmiş Telman Nurəliyev deyir ki, 1990-cı illərdə zavodu yenidən açmaq cəhdləri uğursuz qalıb. Bina hal-hazırda dövlət mülkiyyətindədir, lakin istehsal yoxdur. Kombinatın sahəsi yalnız anbar kimi istifadə olunur.
20-ci əsrin əvvəllərində müsəlmanların dəfni üçün Rusiyadan və başqa ölkələrdən kəfənlər gətirilirdi. Böyük xeyriyyəçi Hacı Zeynalabdin Tağıyev yerli ehtiyacları ödəmək üçün Bakı toxuculuq kombinatını yaratmaq qərarına gəlmişdir. Bakı toxuculuq kombinatı Qafqazda ilk belə müəssisə olmuşdur. Həmin dövrdə fabrikdə 6000-ə yaxın işçi çalışmış, fabrik 140-150 milyon metr parça istehsal etmişdir.
