Paytaxtda şəhid ailəsinə qarşı dələduzluq əməlində təqsirləndirilən şəxslərə hökm oxunub. Bu haqda bu gün, 24 yanvar tarixində Bakuplus.az APA-ya istinadən məlumat verir.
Bakı Ağır Cinayətlər Məhkəməsində elan edilən hökmə əsasən, İxtiyar Orucov 7 il, Balaxan Hüseynli isə 6 il 6 ay müddətinə azadlıqdan məhrum ediliblər.
Şəhid anası övladının bəlkə də ölmədiyinə ümid edərək “falçı”ya müraciət edib. “Falabaxan” şəxs anaya oğlunun ölmədiyini deyib. Daha sonra “falçı”nın oğlu İxtiyar Orucov və şəhidin yaxın qohumu Balaxan Hüseynli əlbir olaraq şəhid anasından daha çox pul ələ keçirmək fikrinə gəliblər.
Beləliklə, dələduzlar qrim ustasına müraciət edərək güya sənədli film çəkəcəklərini bildiriblər. Onlar Balaxan Hüseynlini qrimləyərək şəhidə oxşadıblar. Şəkillər və videogörüntülər çəkərək mərhumun əsirlikdə olduğu təəssüratı yaradıblar. Oğlunun sağ olduğuna inanan zərərçəkənə daha sonra zəng edərək övladını üçüncü ölkənin köməkliyi ilə gətirəcəklərini və 100.000 manat pula ehtiyac olduğunu bildiriblər. Bundan sonra müxtəlif vaxtlarda anadan 26.800 manat pul mənimsəyiblər.
İsa Məmmədli Laçın uğrunda gedən döyüşlərdə şəhid olub. Azərbaycan Respublikasının Prezidenti İlham Əliyevin müvafiq sərəncamlarına əsasən, İsa Məmmədli ölümündən sonra “Vətən uğrunda”, “Cəbrayılın azad olunmasına görə”, “Füzulinin azad olunmasına görə”, “Qubadlının azad olunmasına görə”, “Hərbi xidmətlərə görə” və “Cəsur döyüşçü” medalları ilə təltif edilib.
