Azərbaycan teatr və kino aktyoru, Dövlət mükafatı laureatı, Prezident təqaüdçüsü, “Şöhrət” ordenli Xalq artisti Ramiz Məlikov 80 yaşında vəfat edib. Bu haqda bu gün, 14 dekabr tarixində Bakuplus.az Akademik Milli Dram Teatrının mətbuat xidmətinə istinadən xəbər verir.
Ramiz Məlikov 4 avqust 1943-cü ildə Bakıda anadan olub. O, Mirzağa Əliyev adına Azərbaycan Dövlət Teatr İnstitutunun Dram və kino aktyorluğu fakültəsini bitirib.
O, 1967-ci ildə Akademik Milli Dram Teatrının truppasına aktyor götürülüb. Aktyorluq etməklə yanaşı, Əkrəm Əylislinin “Yastı təpə”, Leonard Frankın “Yad adam”, İlyas Əfəndiyevin “Xurşidbanu Natəvan” kimi pyeslərinin tamaşaya hazırlanmasında rejissor və rejissor assistenti kimi çalışıb.
Ramiz Məlikov Azərbaycan Dövlət Televiziyasının hazırladığı Ənvər Məmmədxanlının “Şərqin şəhəri” (Bəhruz), Əlibala Hacızadənin “İnanmırsansa…” (Adil), Nəriman Həsənzadənin “Kimin sualı var?” (Ədalət) və s. əsərlərin tamaşalarında oynayıb.
Azərbaycan teatr və kino aktyoru 1982-ci ildə Əməkdar artist, 1998-ci ildə isə Xalq artisti fəxri adlarına layiq görülüb.
