Səfərbərlik və Hərbi Xidmətə Çağırış üzrə Dövlət Xidmətinin Xəzər Rayon İdarəsinin sabiq rəisi Ramin Şükürov və zabitləri məhkəmə qarşısına çıxarılıb.
Qafqazinfo.аz-ın məlumatına görə, Bakı Hərbi Məhkəməsində keçirilən ilk iclas gərgin başlayıb.
Ramin Şükürovu üç tanınmış vəkil-Ceyhun Yusifov, Abbas Atakişiyev və Muxtar Mustafayev müdafiə edir.
Vəkillərdən birinin cinayət işi materialları ilə tanış olmaması səbəbindən iş məhkəmə baxışına verilməyib. Ramin Şükürov həbsdə, digərləri ev dustaqlığında mühakimə edilir. Prokuror qətimkan tədbirinin dəyişdirilmədən saxlanılmasını təklif edib. İttiham tərəfinin bu təklifi vəkillərin etirazı ilə qarşılanıb. İttiham və müdafiə tərəfi arasında mübahisə yaranıb.
Ceyhun Yusifov müvəkkilinin həbsdə saxlanılmasına narazılıq edib. Vəkil etirazını belə əsaslandırıb ki, təqsirləndirilən şəxslərin üçü də eyni maddələrlə ittiham olunur, amma biri həbsdə, digərləri azadlıqdadır. Onun sözlərinə görə, R.Şükürov ağır xəstəlikdən əziyyət çəkir, hazırda Penitensiar Xidmətin Müalicə Müəssisəsində stasionar qaydada müalicə alır: “Müttəhimlərə fərqli münasibət ola bilməz. Ramin Şükürov da əvvəl ev dustaqlığında idi. Amma sonradan həbs edildi. Əsas da bu göstərilib ki, ittiham ağırlaşdırılıb. Onda prokuror vəsatət qaldırsın, digərləri barəsindəki ev dustaqlığı qətimkan tədbirini də həbslə əvəz edilsin. İkisi ağ, biri qara adamdır? Hesab edirəm ki, üçünün də statusu bərabərləşdirilməlidir. Ən əsası da şəxs ürək xəstəliyindən əziyyət çəkir. Hospitaldan alınmış həkim rəyini də məhkəməyə təqdim etmişik”.
Həm Şükürovun, həm digərlərinin vəkilləri vəsatəti müdafiə ediblər.
Amma məhkəmə hazırki mərhələdə qətimkan tədbirinin dəyişdirilməməsinə qərar verib.
Hazırlıq iclasının davamı iyulun 11-nə təyin edilib.
Qeyd edək ki, cinayət işi Baş Prokuror yanında Korrupsiyaya qarşı Mübarizə Baş İdarəsi tərəfindən istintaq edilib. Eks-rəis R.Şükürov və həmin idarənin Çağırış şöbəsinin baş zabiti Xalid Əzimov və zabiti Emil Nəbiyevə Cinayət Məcəlləsinin 311.3.1 və 311.3.3 (qabaqcadan əlbir olan bir qrup şəxs tərəfindən külli miqdarda rüşvət alma) maddələri ilə yekun ittiham verilib.
