Paytaxtın Sabunçu rayonu, Kürdəxanı qəsəbəsində yerləşən 304 nömrəli məktəbin həyətyanı sahəsini çirkab sular basıb. Bu haqda BakuTV 25 iyul tarixində reportaj təqdim edib.
Yerli sakinlərin sözlərinə görə, “qırmızı evlər” adlanan binaların kanalizasiyasında yaranan problem səbəbindən çirkab sular toplanır. Məktəbin həyəti üç aya yaxındır ki, bu vəziyyətdədir.
Sabunçu rayon İcra Hakimiyyətinin Kürdəxanı qəsəbə nümayəndəliyindən bildirilib ki, vəziyyətlə bağlı aidiyyəti qurumlar məlumatlandırılıb. Hazırda bu məsələ ilə “Azərsu” ASC məşğul olur.
"Sabunçu rayon Sukanal İdarəsi ilə danışdım. Ərazidən məlumatlıdırlar. Təəssüf ki, orada bizim mərkəzləşdirilmiş kanalizasiya infrastrukturumuz mövcud deyil. Biz tərəfdən heç bir xidmət göstərilmir. İdarədən verilən məlumata görə, orada göldə səviyyə qalxıb, bu səbəbdən çirkab suların əraziyə dağılması baş verib", - deyə “Azərsu” ASC-nin Mətbuat xidmətinin rəhbəri Anar Cəbrayıllı bildirib.
İcra hakimiyyətinin nümayəndəsi qeyd edib ki, ərazidə Pirşağı-Kürdəxanı kanalizasiya kollektoru tikilir. Problemin qısa müddətdə həlli üçün lazımi tədbirlər görülür.
Sözügedən 304 saylı məktəb bu yaxınlarda açılıb. Mayın 2-də Azərbaycan Respublikasının Prezidenti İlham Əliyev və birinci xanım Mehriban Əliyeva 304 nömrəli tam orta məktəbin açılışında iştirak ediblər. Təhsil ocağı Heydər Əliyev Fondunun təşəbbüsü ilə Bakının Sabunçu rayonunun Kürdəxanı qəsəbəsində inşa edilib.
