Sabunçu rayonunda körpəsini zibil yeşiyinə tullayan 32 yaşlı Səbinə Qasımovanın məhkəməsi yekunlaşıb. Bu haqda bu gün, 12 yanvar tarixində Bakuplus.az Qafqazinfo-ya istinadən məlumat verir.
Sabunçu Rayon Məhkəməsinin hökmü ilə ona 1 il islah işləri cəzası verilib.
Hadisə ötən ilin iyul ayında baş verib. Qasımova yenidoğulmuş körpəni zibil yeşiyinə ataraq qaçıb. O, müəyyən edilərək polis bölməsinə gətirilib, uşaq isə körpələr evinə yerləşdirilib.
Qasımova uşağı qeyri-rəsmi nikahda olduğu şəxsdən dünyaya gətirdiyini, sənədi olmadığı üçün onu uşaq evinə verə bilmədiyini deyib.
“4 il olar həyat yoldaşımdan boşanmışam. Qeyri-rəsmi ər-arvad münasibətində olduğum Xəyal adlı şəxsdən hamilə qalmışdım. Xəyal uşağı dünyaya gətirməyimə razı olmadı. Maddi imkanım olmadığı üçün vaxtında tibbi müdaxilə ilə hamiləliyi sonlandıra bilmədim. Qadın məsləhətxanasında həkim hamilələyin müddətinə görə sonlandırılmanın mümkünsüz olduğunu dedi. 15 iyulda Sabunçu xəstəxanasının doğum şöbəsində qız uşağı dünyaya gətirdim.
İmkanım zəif olduğu və ailə üzvləri tərəfindən həmin uşaq qəbul edilməyəcəyi üçün öncə uşaq evinə müraciət etdim, şəxsiyyət vəsiqəm olmadığı üçün uşaq evinin rəhbərliyi tərəfindən müraciətimə imtina cavabı verildi. 17 iyul 2023-cü il tarixində, saat 14:00 radələrində Sabunçudakı həmin əraziyə gedərək bir qədər gəzişdim.
Sonra uşağı, hazırladığım uşaq yeməyini və bezlərini məişət tullantılarının atılması üçün nəzərdə tutulmuş dəmir materialdan olan qutunun içərisinə qoyaraq bir qədər kənarda dayanıb uşağın götürülməsini gözlədim. Bir müddət sonra əvvəllər tanımadığım bir nəfərin oradan keçərkən uşağı görüb götürdüyünü müşahidə etdim. Həmin şəxs ətrafa nəzər yetirəndə məni gördü. Dərhal oradan uzaqlaşaraq yaşadığım evə getdim”, – deyə Qasımova məhkəmə iclasında etiraf edib.
