Xəzər rayonunun Mərdəkan qəsəbəsində yerləşən Dendrologiya bağında ötən ilin noyabr ayından təmir-bərpa işləri aparılır. Bu proses xarici memar və mütəxəssislərin layihələri əsasında həyata keçirilir. Bu haqda bu gün, 11 avqust tarixində Bakuplus.az ARB Xəbər-ə istinadən məlumat verir.
Bərpa zamanı bağın ərazisində yerləşən istixanalar, inzibati binalar, ərazi boyunca uzanan hasar yenidən qurulur, nəzarət-buraxılış məntəqəsi, köməkçi tikililər əsaslı təmir olunur.
1895-1920-ci illər arasında Dendrologiya bağı xeyriyyəçi və neft sahibkarı Murtuza Muxtarovun şəxsi bağ evi olub. Hazırda Murtuza Muxtarovun bu ev-muzeyi də təmir-bərpa edilir. Evdə bərkitmə işləri görülür. Görülən işlər nəticəsində evin əvvəlki görkəminə qaytarılması nəzərdə tutulub.
Bağın ərazisindəki hovuzun da bərpası aparılır. Onun ətrafında qoruyucu divarlar, məhəccərlər tikiləcək. Hovuza qalxmaq üçün istifadə olunan pilləkənlər artıq çox köhnə olduğundan təhlükəlidir. Təmir-bərpa prosesində hovuzun ümumilikdə əsaslı təmiri həyata keçiriləcək.
Məşhur rus şairi Serqey Yeseninin ev-muzeyinində də təməli möhkəmləndirilir və əsaslı təmir olunur.
Vaxtilə subtropik bitkiçiliyin inkişafına səbəb olan bağda hazırda 600-dək bitki növü, müxtəlif növ ağaclar, güllər, nəsli kəsilməkdə olan endomik bitkilər var. Bağın 8 hektar ərazisində isə adı Qırmızı kitaba salınmış 141 növ ağac və kol bitkiləri mövcuddur.
Ekologiya və Təbii Sərvətlər Nazirliyinin və bir çox elmi tədqiqat institutlarının mütəxəssisləri tərəfindən bağa baxış keçirilib və qurumuş xəstə ağacların müalicə edilməsi məqsədilə müxtəlif rəylər alınıb. Bundan əlavə, yeni layihəyə əsasən, ağacların və yaşıllıqların sayının artırılması, nəzarət və qulluq işlərinin gücləndirilməsi də həyata keçirilir.
Bərpa zamanı həmçinin bağın bütün ərazisinin abadlaşdırılması planlaşdırılır. Burada müasir işıqlandırma sistemlərinin quraşdırılması, piyada yollarının çəkilməsi, uşaq əyləncə meydançalarının salınması nəzərdə tutulub. Təmir işləri gələn il başa çatdırılacaq.
Qeyd edək ki, neft maqnatının bağ evi 1925-ci ildən etibarın dövlətin mülkiyyətinə keçib və burada bir sıra institutlar fəaliyyət göstərib. Nazirlər Kabinetinin 2014-cü il qərarı ilə AMEA-nın Mərdəkan dendrarisi Dendrologiya İnstitutu adlandırılıb. Hazırda Nazirlər Kabinetinin 2022-ci il qərarı ilə ərazidə “Dendrologiya bağı” publik hüquqi şəxs yaradılıb və Bakı ŞİH başçısının tabeliyində “Dendrologiya bağı” publik hüquqi şəxs, eyni zamanda Elm və Təhsil Nazirliyinin Dendrologiya İnstitutu fəaliyyət göstərir.
