Bakıda fəaliyyət göstərən 201 saylı tam orta məktəbin keçmiş direktor müavini Svetlana Hüseynova Bakı Şəhər üzrə Təhsil İdarəsini (BŞTİ) məhkəməyə verib.
Qaynarinfo-nun məlumatına görə, Svetlana Hüseynovanın iddia tələbi mənəvi zərərin ödənilməsi ilə bağlıdır.
Keçmiş direktor tələbini şərəf, ləyaqət və işgüzar nüfuzuna xələl gətirilməsi ilə izah edib. İşə Nəsimi Rayon Məhkəməsində baxılacaq.
Svetlana Hüseynova ötən ilin dekabrında işdən çıxarılıb. O, 201 saylı məktəbin direktoru Afaq Əliyevadan şikayətçi olması ilə gündəmə gəlmişdi.
Svetlana Hüseynova iddia etmişdi ki, direktor məktəbi özünün biznes obyektinə çevirib. Onun sözlərinə görə, Afaq Əliyeva 5 və 6-cı siniflərdə oxuyan şagirdlərin sayını saxta yolla artırmaqla külli miqdarda büdcə vəsaitini mənimsəyir. Bundan başqa dərsə gəlməyən şagirdlərdən pul alaraq onlara qiymət yazdırır.
Həmin vaxt Afaq Əliyevadan şikayətçi olan başqa bir müəllim - Lalə Şəfaqətova isə mediaya açıqlamasında direktorun Svetlana Hüseynovaya qarşı qarayaxma kampaniyası apardığını bildirmişdi.
Məlumata görə, Svetlana Hüseynova ilə Bakı Şəhəri üzrə Təhsil İdarəsi arasındakı məhkəmə çəkişməsi bu qalmaqalla bağlıdır.
