Bakıda həyat yoldaşını parkda bıçaqlayaraq qətlə yetirməkdə təqsirləndirilən Natiq Məhərrəmovun cinayət işi üzrə məhkəmə prosesi davam edir.
Oxu.az xəbər verir ki, Bakı Ağır Cinayətlər Məhkəməsində hakim Telman Hüseynovun sədrliyi ilə keçirilən iclasda şahid ifadələri dinlənilib.
Təqsirləndirilənin anası bildirib ki, oğlunun ailəsində uzun müddət münaqişələr olub. Qadın ifadəsində qeyd edib ki, gəlin böyük-kiçik yeri bilməyib və oğlunun uşaqlıq dostu ilə münasibəti olmasından şübhələnib.
Hadisə şahidi olan 17 yaşlı yeniyetmə isə ifadəsində bildirib ki, parkda oturan zaman bir qadının "kömək edin" qışqırığını eşidib və o, qaçanda kişinin bıçaqla qadının qoluna vurduğunu görüb. Onun sözlərinə görə, qadın can verib, daha sonra isə təcili yardım gəlib.
Məhkəmənin növbəti iclası noyabrın 26-na təyin olunub.
İttihama görə, 35 yaşlı Natiq Məhərrəmov Suraxanıda həyat yoldaşı, 39 yaşlı Sevinc Məhərrəmovanı bıçaqlayaraq qətlə yetirib. Ona qarşı CM-nin 120.2.2, 120.2.4 və 221.3-cü maddələri ilə ittiham irəli sürülüb.
