Nizami Rayon Məhkəməsində qəsdən sağlamlığa yüngül zərər vurmada təqsirləndirilən Cabir Cəbrayılovun cinayət işi üzrə məhkəmə istintaqı yekunlaşıb.
Pravda.az-ın əldə etdiyi məlumata görə, hakim Mətanət Hacıyevanın sədrliyi ilə keçirilən prosesdə hökm oxunub.
İttihama görə, hadisə 2026-cı ilin yanvar ayında gecə saatlarında paytaxtın Nizami rayonu ərazisində baş verib.
Cabir Cəbrayılov qeyri-rəsmi münasibətdə olduğu zərərçəkmiş Vəsilə Məmmədova ilə birlikdə yaşayış məntəqəsinin yaxınlığında piyada hərəkətdə olarkən tərəflər arasında mübahisə yaranıb. Mübahisəyə səbəb qadının irəlidə getməsi və bununla bağlı təqsirləndirilən şəxsin ona irad bildirməsi olub. Mübahisə zamanı tərəflər arasında gərginlik artıb və qarşılıqlı narazılıq yaranıb. Bu zaman Vəsilə Məmmədova Cabir Cəbrayılovun ünvanına nalayiq ifadələr işlədib. Bundan əsəbiləşən təqsirləndirilən şəxs qadına qarşı fiziki zor tətbiq edib və onun sifət nahiyəsinə şillə vurub.
Hadisə nəticəsində zərərçəkmiş şəxs müxtəlif bədən xəsarətləri alıb. Məhkəmənin hazırlıq iclasında ifadə verən Vəsilə Məmmədova təqsirləndirilən şəxslə barışdığını təsdiqləyib. Qadın bildirib ki, ona vurulmuş zərər tam ödənilib, Cabirə qarşı heç bir şikayəti, tələbi və ya iddiası yoxdur.
Məhkəmənin hökmü ilə Cabir Cəbrayılov cinayət məsuliyyətindən azad edilib.
Qeyd edək ki, ad və soyadlar şərti verilib.
