Ötən ilin oktyabr ayında Bakının Sabunçu rayonu, Kürdəxanı qəsəbəsində ölümlə nəticələnən zəncirvari qəzanı törədən 24 yaşlı İlkanə Əhmədovanın məhkəməsi başa çatıb. Bu haqda bu gün, 23 fevral tarixində Qafqazinfo məlumat verib.
Sabunçu Rayon Məhkəməsinin 22 fevral tarixli hökmü ilə İ.Əhmədova 1 il 6 ay avtomobil idarə etmək hüququndan məhrum edilməklə 3 il müddətinə azadlıqdan məhrum olunub. Onun cəzasını məntəqə tipli cəzaçəkmə müəssisəsində çəkəcəyi qeyd edilib.
İstintaq zamanı İ.Əhmədovanın mərhum F.Umudovun ailəsi ilə barışdığı, dəymiş ziyanı ödədiyi məlum olub.
İfadə verən F.Umudovun atası 24 yaşlı xanım sürücüdən şikayətçi olmadığını bildirib.
Qəza hadisəsi 10 oktyabr, saat 17:20-də Kürdəxanı şosesi, Əjdər Məlikov küçəsində, “Nail Market”in qarşısında baş verib. “Chevrolet” markalı avtomobili idarə edən Sumqayıt şəhər sakini, 23 yaşlı İlkanə Əhmədova sükana nəzarəti itirib. Nəticədə o, yolun kənarında dayanan "Mitsubishi" markalı avtomobilə çarpılıb. Zərbənin gücündən “Mitsubishi” hərəkətdə olan “Audi” markalı avtomobillə toqquşub.
İlkanə Əhmədova sərxoş vəziyyətdə olmadığı müəyyən olunub.
Qəzasında həlak olan Fəxri Umudovun həyat yoldaşı Nahidə Umudova yaşadığı evin həyətindəki qaz borusundan özünü asıb. İntihardan əvvəl o, həyat yoldaşının telefonuna “Mən sənsiz qala bilmərəm” mesajı yazıb. Umudovlar 18 il evli olublar. 3 il əvvəl onların övladı dünyaya gəlib.
