Son zamanlar ölkə ərazisində yeni fırıldaqçılıq üslubu yayılır. Bu barədə müvafiq səs yazısı sosial şəbəkələrdə paylaşılıb. Bu haqda bu gün, 5 dekabr tarixində Bakuplus.az Xəzər Xəbər-ə isitinadən məlumat verir.
Vətəndaşlara zəng vuran dələduzlar insanın bank kartı haqqında kifayət qədər məlumata, hətta kartdakı rəqəmlərə malikdirlər. Vətəndaşlar bəzən bilmədən zəng edənlərin tələb etdiyi məlumatları ötürürlər. Nəticədə onlar kiberfırıldaqçılığın qurbanına çevrilirlər.
Sosial şəbəkələrdə əsas müzakirə olunan mövzu həmin şəxslərdə şəxsi məlumatlarla bağlı geniş informasiyanın haradan olmasıdır.
İKT mütəxəssisi Azər Əlili bildirib ki, insan haqqında məlumat əvvəlcə açıq internet mənbələrindən toplanır. Əgər şəxs nə vaxtsa kartdan karta köçürmə edibsə, o, artıq kartdakı 16 nömrəni bildirib.
Ekspert əlavə edib ki, vətəndaşın şəxsiyyət vəsiqəsi, yaşayış ünvanı, doğum tarixi və kart məlumatları məxfi saxlanılmalıdır.
Daxili İşlər Nazirliyindən (DİN) bildirilib ki, vətəndaşlar belə hallarla rastlaşdıqdan sonra mütləq polisə məlumat verməlidirlər. Onlar DİN-in 102 xidməti, eləcə də nazirliyin sosial şəbəkələrdəki səhifələrinə yaza bilərlər.
