Əməliyyatında canlı yayım açılan həkim açıqlama verib. Bu haqda bu gün, 11 dekabr tarixində Bakuplus.az ARB-yə istinadən xəbər verir.
Bir neçə gün öncə sosial şəbəkələrdə cərrahi əməliyyat zamanı tibb işçilərinin canlı yayım açdıqları barəsində videogörüntülər yayılmışdı. Bu hal insanlar arasında geniş müzakirələrə səbəb olub. Kimsə xəstənin həyatının təhlükəyə atıldığını deyib, digərləri həkimi qeyri-peşəkarlıqda günahlandırıblar.
Əməliyyatı icra edən Elmir Qəhrəmanov məsələ ilə bağlı bildirib ki, həmin xanımın işi elə sosial şəbəkələri idarə etməkdir:
“Əməliyyatxananın daxilində steril zona və qeyri-steril zona var. Texniki zona var ki, orada yazılar yazılır və sairə işlər görülür. O xanım da texniki zonada əyləşmişdi və qeyri-steril bir yerdə idi. Xəstənin həyatı üçün qeyri-adi təhlükə yarada biləcək heç bir hal yox idi”, – deyə həkim qeyd edib.
O, canlı yayım zamanı xəstənin razılığını aldığını da qeyd edib.
“İnsanlar bu gün televiziyadan çox sosial şəbəkələrə baxırlar. Əməliyyat prosesi onların özlərinə də maraqlıdır. Hamı bir-birini sosial şəbəkədən tanıyır. İndi oldu, keçdi. Bundan sonra nəzərə alacağıq”, – deyə həkim əlavə edib.
Ekspertlər də deyirlər ki, əməliyyatlarda görüntüləri yaymaq əslində doğru deyil. Amma bununla bağlı qanunda hər hansı bir tələb də qoyulmayıb.
Klinikanın rəhbərliyindən isə bildirildi ki, əməliyyatı icra edən həkimə xəbərdarlıq edilib, canlı yayımı açan xanım isə işindən azad olunub.
