Azərbaycanın Mərkəzi Bankı (AMB) “PAŞA Bank” ASC-yə qarşı 3109 manat maliyyə sanksiyası tətbiq edib. Bu haqda bu gün, 23 yanvar tarixində Bakuplus.az AMB-yə istinadən məlumat verir.
15 dekabr 2023-cü il - 14 yanvar 2024-cü il tarixlərini əhatə edən saxlama dövründə “PAŞA Bank” xarici valyuta ilə məcburi ehtiyatları tələb olunan normaya uyğun təmin etmədiyinə görə qanunun 32-ci maddəsinə müvafiq olaraq cərimələnib.
Bununla yanaşı, AMB tərəfindən aparılmış kompleks yoxlama çərçivəsində cinayət yolu ilə əldə edilmiş əmlakın leqallaşdırılmasına və terrorçuluğun maliyyələşdirilməsinə qarşı mübarizə haqqında qanunvericiliyin pozulması ilə bağlı İnzibati Xətalar Məcəlləsinin 598.1.2-ci maddəsinə müvafiq olaraq, “Paşa Kapital İnvestisiya Şirkəti” QSC-nin vəzifəli şəxsi Bakı Şəhəri Nəsimi Rayon Məhkəməsi tərəfindən 2 min manat məbləğində cərimə edilib.
Sözügedən maddəyə əsasən, investisiya şirkətinin vəzifəli şəxsi monitorinq iştirakçıları və monitorinqdə iştirak edən digər şəxslər tərəfindən eyniləşdirmə sənədlərinin və pul vəsaitləri və ya digər əmlakla əməliyyatlara dair sənədlərin saxlanması ilə bağlı vəzifələrini yerinə yetirməyib.
