“Bakı Metropoliten” QSC maşinist olmaq istəyən və qərar verməkdə tərəddüd edən xanımlar üçün yeni imkan yaradır. Bu haqda bu gün, 8 dekabr tarixində Bakuplus.az quruma istinadən məlumat verir.
Metropolitenin Təlim və Tədris Mərkəzində qadınların bu sahədə uğur qazana biləcəyini və bu baxımdan kişilərdən geri qalmadıqlarını bir daha əyani şəkildə nümayiş etdirmək üçün açıq qapı günü keçiriləcək.
Açıq qapı günündə iştirak edəcək xanımlara metropolitenlə bağlı ümumi məlumatları almaq, bir çox sahələrlə ətraflı tanış olmaq, ən əsası, mərkəzin əsas guşəsi olan qatar trenajoru barədə müfəssəl məlumat almaq imkanı yaradılacaq.
İştirakçılara maşinist peşəsinin sirləri, iş rejimi barədə və digər faydalı məlumatlar təqdim ediləcək. Metropolitenin sahə üzrə rəhbər və mütəxəssis heyəti maraqlananlarla fikir mübadiləsi aparacaq və onların suallarını cavablandıracaq.
Görüşdə maşinist qadın Türkan Bəylər də iştirak edəcək.
Qeydiyyat üçün (012) 4900101 (daxili – 17-29), (050) 2781811, eləcə də maryam.quliyeva@metro.gov.az elektron poçt ünvanı ilə müraciət etmək mümkündür.
