Sabunçu rayonu, Maştağa qəsəbəsində yolların asfaltlanması yarımçıq qalıb. Bu haqda bu gün, 12 dekabr tarixində Bakuplus.az Xəzər Xəbər-ə istinadən məlumat verir.
Adıçəkilən qəsəbənin Axund Mirzə Əbdülkərim küçəsində su xətti çəkilən zaman yollar qazılıb. Daha sonra isə əraziyə asfalt vurulsa da, iş yarımçıq qalıb.
Sakinlərin sözlərinə görə, bir damcı yağış düşən kimi küçədə hərəkət etmək mümkün deyil. Bəzən qaz borularının üzəri ilə gedirlər. Dərin gölməçələr insanların hərəkətinə ciddi çətinliklər yaradır.
“Kim necə istəyir, elə də edir. Biri gəlir qazır, yalandan üstünü örtür, çıxır gedir. Bələdiyyəyə müraciət etmişik, düzələcəyini deyirlər, amma nəticə yoxdur”, – deyə yerlilər əlavə ediblər.
Bələdiyyədən məsələ ilə bağlı bildirilib ki, Avtomobil Yolları Dövlət Agentliyinə məsələ ilə bağlı müraciət olunub. Sonuncu isə sözügedən küçə ilə bağlı Nazirlər Kabinetinə müraciət olunduğunu vurğulayıb.
