Bəzən ehtiyatsızlıqdan yaxud təsadüfi hallarda müştəri tərəfindən mağazadakı ixtiyari məhsula ziyan vurulur. Yəqin ki, bir çoxlarımız tərəfindən bu hal müşahidə olunub və ya bunu özümüz yaşamışıq.
Bu isə həm alıcının, həm də mağaza sahibinin hüquqi məsuliyyətini gündəmə gətirir. Məsələ o qədər geniş yayılıb ki, mağaza əməkdaşları ilə müştərilər arasında tez-tez mübahisələrə belə səbəb olur.
Mağazada alıcı bir malı sındırarsa, bunun dəyərini ödəmək məcburiyyəti varmı və bu məsuliyyət qanunla necə tənzimlənir?
Bakuplus.az bu suala qanunla cavab verir.
Azərbaycan Respublikasının Mülki Məcəlləsinin 152.10-cu maddəsinə əsasən, əgər əşya ictimai yerdə və ya ətrafdakı insanlar üçün təhlükəli şəraitdə yerləşdirilibsə, vətəndaşın onunla ehtiyatsız davranması nəticəsində əşya zədələnibsə, zərərin ödənilməsi tələb oluna bilməz.
Başqa sözlə, əgər sən mağazada adi qaydada hərəkət edərkən, xəbərdarlıq edilməyən və ya təhlükəli şəkildə yerləşdirilmiş bir əşyanı təsadüfən sındırmısansa, ödəmə məcburiyyətin yoxdur. Bu mağazanın təhlükəsizlik tədbirləri görməli olduğu və müştərilərin sərbəst hərəkət hüququnu təmin etməli olduğu anlamına gəlir.
Mağaza əşyaları elə yerləşdirməlidir ki, hər kəs üçün təhlükəsiz olsun. Əgər heç bir xəbərdarlıq yoxdursa, əşya müştərinin yolunun üstündə və ya riskli şəkildə yerləşdirilibsə, bu zaman məsuliyyət mağazanın üzərinə düşür.
Amma unutmayın, əgər sizin davranışınız ehtiyatsız və ya səhlənkar olubsa, məsələn, bilərəkdən və ya diqqətsiz davranmısınızsa, o zaman mağaza zərərin ödənilməsini tələb edə bilər.
Fidan İlqar
