Bakı Apellyasiya Məhkəməsində dələduzluqda təqsirləndirilən Pərvin Səfərlinin (ad, soyad şərtidir) işi üzrə qərar açıqlanıb.
Təqsirləndirilən şəxs barəsində seçilmiş həbs qətimkan tədbiri ləğv olunub və o, məhkəmə zalından azadlığa buraxılıb.
İttihama görə, Pərvin Səfərli müxtəlif şəxslərə onları dövlət məktəblərində müəllim kimi işə düzəldəcəyini və müəllimlərin sertifikatlaşdırma imtahanından keçmələrinə kömək edəcəyini vəd edərək pul alıb.
Cinayət işinin materiallarına əsasən, o, bir nəfərin qohumunu məktəbə müəllim düzəldəcəyi vədi ilə 4 min manat alıb, bunun yalnız min manatını geri qaytarıb. Digər epizodda təqaüdə çıxmış sabiq müəllimi yenidən işə düzəldəcəyini deyərək 4 min manat alıb və yenə 3 min manatını mənimsəyib. Həmçinin sertifikatlaşdırma imtahanından keçirmə vədi ilə daha 5 min manat alıb, bunun 2 500 manatını qaytarsa da, qalan məbləği verməyib.
İstintaqın hesablamasına görə, bu əməllərlə zərərçəkmişlərə ümumilikdə 8 500 manat maddi ziyan vurulub.
Xatırladaq ki, Xətai Rayon Məhkəməsi Pərvin Səfərlini 2 il azadlıqdan məhrum etmiş və o, məhkəmə zalında həbs olunmuşdu. Zərərçəkmiş və Baş prokurorun müavini hökmdən apellyasiya şikayəti və protest vermişdilər.
mənbə: pravda.az
