Metropolitenin keçmiş rəisi vəfat edib. Bu haqda bu gün, 15 dekabr tarixində Bakuplus.az Report-a istinadən xəbər verir.
"Bakı Metropoliteni" QSC-nin 5-ci rəisi olmuş Cəfər Yusifov 78 yaşında vəfat edib. O, 50 ilə yaxın müddət ərzində əmək fəaliyyətini bu nəqliyyat növünə həsr edib.
C.Yusifov Azərbaycan Politexnik İnstitutunun İnşaat fakültəsini Qızdırıcı sistemlər və ventilyasiya qurğuları mühəndisi ixtisası üzrə bitirib.
Bakı metrosunda 1968-ci ildə tunel fəhləsi kimi işləməyə başlayıb, sonra tunel ustası və distansiya rəisi kimi fəaliyyət göstərib, tunel qurğuları xidmətinin rəisi olub. 1993-cü ilin noyabrında metronun rəisi təyin edilib və 5 il bu vəzifədə çalışıb. Sonrakı illərdə əmək fəaliyyətini metroda müxtəlif vəzifələrdə davam etdirib.
Cəfər Yusifov “Şöhrət” ordeninə layiq görülüb, metroda göstərdiyi xidmətlərə görə “Fəxri dəmiryolçu” döş nişanı ilə təltif edilib.
