Bakının Suraxanı rayonu, Əmircan kəndində 1861-ci ildə tikilmiş tövlə dağılmaq üzrədir. O vaxt, yerli sakinlərin dediyinə görə, burada kənddə olan neft quyularına su daşıyan atlar saxlanılırdı. Bu tövlə tikildiyi gündən bir dəfə də olsun təmir olunmayıb. Artıq tövlənin bəzi hissələri dağılıb. Bu haqda ATV Xəbər 25 iyul tarixində reportaj təqdim edib.
19-cu əsrdə tikilmiş bu tövlə qəsəbə sakini Vəli Zairovun həyətində yerləşir. Əsrin əvvəllərində tövlə avtomobil qarajı kimi istifadə olunmuşdur.
Suraxanı rayon İcra Hakimiyyəti başçısının Əmircan qəsəbəsi inzibati ərazi dairəsi üzrə nümayəndəsi Əlixan Əliyev deyir ki, bu ərazidə təxminən 20-dən çox belə tikili olub. Onların çoxu baxımsızlıqdan məhv olub. Əvvələr bir neçə dəfə Mədəniyyət Nazirliyinə müraciət etsələr də, müsbət cavab olmayıb.
Mədəniyyət Nazirliyinin sektor müdiri Nuridə Allahyarova bildirib ki, bir tikilinin abidə statusunda dövlət tərəfindən mühafizə olunan abidələrin siyahısına daxil edilməsinin müəyyən prosedur qaydaları var. Bu, həm dövlət xidmətinin əməkdaşları, mütəxəssisləri tərəfindən mütəmadi keçirilən monitorinqlər nəticəsində tərəfimizdən yeni aşkar olunan abidələr qismində qeydə alına bilər və yaxud da vətəndaşların müraciəti əsasında və, eyni zamanda arxeoloqların, tarixçilərin, aidiyyəti üzrə mütəxəssislərin müraciətləri əsasında qeydiyyata alınması üçün prosedurlara başlanıla bilər.
