Moskva Dövlət Universitetinin (MDU) Bakı filialında abituriyentlər üçün “Açıq qapı” günü keçiriləcək. Bu haqda bu gün, 17 aprel tarixində Bakuplus.az universitetin rəsmi İnstagram səhifəsinə istinadən xəbər verir.
M.V.Lomonosov adına universitetdə 2024/2025-ci illərdə bakalavr və magistr təhsili almaq istəyənlər tədbirdə iştirak edə bilərlər.
“Açıq qapı” günü abituriyentlər:
- 2024/2025-ci tədris ili üçün universitetə qəbulun şərtləri və qaydaları ilə tanış olacaqlar;
- Filialın Filologiya, Tətbiqi-riyaziyyat, Kimya, Psixologiya, İqtisadiyyat və Fizika fakültələrində bakalavr və magistr səviyyələrində tədrislə bağlı hərtərəfli məlumat alacaqlar;
- Qəbul imtahanlarına hazırlaşmaq üçün lazım olan materialları əldə edə biləcəklər.
Tədbir aprelin 27-də saat 14:00-da Bakı şəhəri, Hüseyn Cavid prospekti, 133 ünvanında, “Elmlər Akademiyası” metro stansiyasının yaxınlığında baş tutacaq. Daha sonra, saat 15:30-da isə universitetin kampusuna ekskursiya olacaq.
Ətraflı məlumat üçün 012 598 93 32 nömrəsi ilə əlaqə saxlamaq mümkündür.
