Bakı şəhəri, Nərimanov rayonu, Fətəli xan Xoyski, 212 ünvanında yerləşən keçmiş Bakı Şin Zavodunun iki istismara yararsız vəziyyətdə olan dördmərtəbəli yataqxanası söküləcək. Bu haqda bu gün, 13 fevral tarixində APA məlumat verib.
Yataqxanalarda ümumilikdə 140 ailə məskunlaşıb.
Fövqəladə Hallar Nazirliyi və aidiyyəti qurumların nümayəndələri binalara baxış keçirərək toplanmış sənədləri Nazirlər Kabinetinə təqdim ediblər.
Sakinlər bildiriblər ki, onlardan müvafiq sənədləri rayon İcra Hakimiyyətinin və kommunal xidmətlərin əməkdaşları toplayırlar. Bu istiqamətdə işlərin sürətləndirilməsi üçün rayonda səyyar vaqon-qərargah da quraşdırılıb, sənədlərin toplanması başa çatdırılır. Sənədlərin toplanması başa çatdıqdan sonra yataqxanaların sökülməsinə başlanılacaq.
Sakinlərin sözlərinə əsasən, yaşadıqları mənzillərə görə kompensasiya təklif edilsə də, onlar mövcud yataqxanaların yerində tikiləcək yeni evlərdən mənzillə təmin olunmaq variantına üstünlük veriblər.
Hələlik sakinlərin köçürülməsi şərtləri ilə bağlı yekun qərar yoxdur.
Sözügedən yataqxanalar 1956-cı ildə tikilib. Hazırda orada, əsasən, zavodun keçmiş işçiləri yaşayırlar.
