Bakıda daha bir həyət abadlaşdırılaraq sakinlərin istifadəsinə verilib. Bu haqda 7 oktyabr tarixində BakuPlus.az Azərtac-a istinadən xəbər verir.
“Bizim həyət” layihəsi çərçivəsində yenilənən ərazi Nəsimi rayonu, 5-ci mikrorayon, Asif Məhərrəmov küçəsi, 64 və 20 Yanvar küçəsi, 4/66 ünvanlarında 1500 nəfər sakinin yaşadığı çoxmərtəbəli binaları əhatə edir.
Gənclərin asudə vaxtlarını səmərəli keçirmələri məqsədilə ərazidə süni örtüklü minifutbol stadionu, şahmat meydançası, müxtəlif idman qurğuları, uşaq meydançaları salınıb. Ərazidə 2 söhbətgah, çoxsaylı oturacaqlar, tullantılar üçün qutular, quş yuvaları və pişik evləri quraşdırılıb.
Sakinlərin istək və maraqları nəzərə alınaraq, həyətdə yeni işıq dirəkləri, müşahidə kameraları quraşdırılıb, binaların fasad və blokları, kanalizasiya xətləri tam təmir olunub, asfalt və dam örtüyü yenilənib.
Həyətin ərazisindəki mövcud yaşıllıqların bərpası ilə yanaşı, 100 ədəd müxtəlifcinsli ağac və minlərlə kol əkilib, 1200 kv.m ərazidə yaşıllıq zolağı salınıb. Bununla yanaşı, həyətin ətrafında adi daşsarmaşığı və digər sarmaşaraq uzanan bitkilər əkilməklə “yaşıl sədlər” (green barriers) yaradılıb.
[URIS id=73724]
