FHN-nin Dövlət Yanğın Nəzarəti Xidməti yanğın təhlükəli obyektin fəaliyyətini məhdudlaşdırıb. Bu haqda 6 iyun tarixində Fövqəladə Hallar Nazirliyi məlumat verib.
Nizami rayonu, Babək prospekti, 2222-ci məhəllə ünvanında yerləşən “ENJOY” gecə əyləncə klubunda yanğın təhlükəsizliyi sahəsində çoxsaylı nöqsanlar aşkar olunub. Həmin nöqsanların insan həyatı və ya sağlamlığına, ətraf mühitə və dövlətin əmlak maraqlarına birbaşa təhlükə yaratdığı müəyyən edilib.
Aşkar olunan nöqsanlar:
- obyekt normaya uyğun ehtiyat çıxış yolu ilə təmin edilməyib;
- obyektin əsas zalında döşəmə hissə divar boyunca 40sm hündürlüyündə taxta diktlərdən istifadə olunaraq, üstü xalça ilə üzlənib ki, bu da əlavə yanğın təhlükəsi yaradır;
- obyektin qapılarının təxliyə məqsədilə çıxış istiqamətində açılması təmin edilməyib;
- obyektdə avtomatik yanğınxəbərverici siqnalizasiya qurğusu quraşdırılmayıb;
- obyekt ilkin yanğınsöndürmə vasitələri və odsöndürən balonlarla tam təmin olunmayıb;
- elektirik enerjisinin kəsilməsi halları nəzərə alınaraq, obyekt ehtiyat elektrik generatoru ilə təmin edilməyib;
- obyektin istismarı Dövlət Yanğın Nəzarəti Xidməti ilə razılaşdırılmayıb.
Baş verə biləcək yanğın hadisələrindən insanların həyatının, sağlamlığının qorunması məqsədilə gecə klubunda işlərin və xidmətlərin göstərilməsinin dayandırılması barədə qərar qəbul olunub.
[URIS id=47435]
