Bakının Nizami rayonunda söküntü üçün nəzərdə tutulan ərazidə sakinlərlə razılaşma olmadığı üçün hasarlama işləri dayandırılıb. Bu barədə Oxu.az Nizami rayon İcra Hakimiyyətinin ictimaiyyətlə əlaqələr şöbəsinin müdirinə istinadən məlumat verib.
Onun sözlərinə görə, ərazidə söküntü işləri ümumiyyətlə aparılmayıb:
“Məlumat yayılan kimi dərhal əraziyə baxış keçirilib. Məlum olub ki, Nizami rayonu, K.Balakişiyev küçəsi, 6 ünvanında yataqxana binasının, A.Manafov küçəsi, 8, M.S.Ordubadi küçəsi, 1 və 3 ünvanlarında qəzalı və istismar müddəti bitmiş yaşayış binalarının sökülməsi və çoxmərtəbəli binaların tikintisi nəzərdə tutulub.
Sakinlərin müraciəti əsasında həmin ünvanda tikintidən öncə hasarlanma işlərinə cəhdin qarşısı alınıb. Razılıq olmasa, heç bir proses aparıla bilməz. Razılaşmadan sonra köçürülmə prosesi aparıla bilər. Sözügedən ünvanlarda yaşayan sakinlərin hüquqi şəkildə razılıqları alındıqdan və buna dair müqavilələr imzalandıqdan sonra işlərin başlanması nəzərdə tutulur”.
Verilən məlumata görə, tikilməkdə olan binaların bütün hüquqi və icazə sənədləri tam qaydasındadır.
Daha öncə məlum olub ki, rayonun Azər Manafov küçəsi, 8 ünvanında inşaat kranı binaların ortasında quraşdırılıb. Sakinlərin sözlərinə görə, 6-7 aydır 3 binanın ortasında yerləşən ərazini hasarlayıblar. Həyətə giriş-çıxışı 4 tərəfdən bağlayıblar və hündür inşaat kranını heç bir təhlükəsizlik qaydalarına riayət etmədən quraşdırıblar.
