Nizami rayonu, Qara Qarayev prospektində yanğın təhlükəsizliyinə riayət olunmayan obyektlər bağlanıb. Bu haqda bu gün, 15 dekabr tarixində Bakuplus.az Fövqəladə Hallar Nazirliyinə istinadən xəbər verir.
Keçirilən yoxlama zamanı adıçəkilən ərazidə yerləşən “Sunay”, “İsa-N”, “Pərviz” və “Elektron” elm-istehsalat firmasına məxsus ticarət mərkəzlərində aşağıdakı nöqsanlar aşkar edilib:
Obyektlərdə avtomatik yanğınxəbərverici siqnalizasiya qurğuları tam quraşdırılmayıb;
Su hovuzu inşa edilməyib və daxili yanğın su kranları, yanğın hidrant qurğuları quraşdırılmayıb;
Elektrik təsərrüfatı qaydalara uyğun quraşdırılmayıb;
Obyektlərin bəzi sahələrində elektrik xətləri yanar konstruksiyaların üzəri ilə çəkilib;
Elektrik mühərrikləri, müxtəlif təyinatlı aparat və cihazlar müvafiq qaydalara uyğun seçilməyib, eləcə də artıq yükləmədən və qısaqapanmadan mühafizə edilməyib;
Taxta konstruksiyalı elementlər odadavamlı məhlulla hopdurulmayıb;
Obyektlərdə təxliyə üçün şərait yaradılmayıb;
Obyektlər ilkin yanğınsöndürmə vasitələri ilə tam təmin olunmayıb;
Ticarət sıralarında piştaxtalar olan cərgələrdə ara məsafələr gözlənilməyib;
Obyektlərdə insanların yanğın hadisəsi haqqında xəbərdar edilməsi üçün xəbərverici qurğular quraşdırılmayıb;
Ticarət sıralarında taxta, karton, lambir və tezalışan çadır tipli materiallardan istifadə edilməklə arakəsmələr quraşdırılıb;
Ticarət mərkəzinin sıraları küçə ticarəti ilə məşğul olanlar tərəfindən tutulduğundan yanğın avtomobillərinin ticarət mərkəzinə yaxınlaşması məhdudlaşdırılıb.
Sadalanan qayda pozuntuları ilə əlaqədar adıçəkilən obyektlərin fəaliyyəti dayandırlıb, sahibkarlar məsuliyyətə cəlb olunublar.
