Türkiyədəki zəlzələnin Bakıya gətirilmiş şahidi həmin anlar barəsində danışıb. Bu haqda bu gün, 11 fevral tarixində Bakuplus.az Bizim Media-ya istinadən xəbər verir.
Turqut Özal Üniversitetinin magistr tələbəsi Aytəkin Bəbirova faciə zamanı Malatyada olub.
“Hadisə günü yatmışdım, rəfiqəm məni oyatdı. Baxdım ki, evin bütün əşyaları yerdədir. Ev çəkələyi ilə həyətə düşmüşdüm. Qar yağırdı, şaxta və soyuqdan ayaqlarım donmuşdu”.
O, günorta 4-ə qədər taksi dayanacaqlarında qaldığını, daha sonra kafelərdə sığındığını bildirdi. Birinci təkandan sonra Aytəkin evə qalxaraq paltar götürmək istəyib.
“Qalxdıq ki, əynimi dəyişim. O an 2-ci böyük zəlzələ baş verdi. Qonşumuz və rəfiqəm məni çölə çıxardılar. Yan binamız uçdu, insanların bağırtı səsləri, dağıntı altında qalan canlar, o vahimə gözümün önündən getmir”, - deyə Aytəkin həmin anları xatırlayır.
O, ətrafdakı binaların qorxu filmlərindəki kimi uçduğunu və şəhərdən əsər-əlamət qalmadığını deyir:
“Bina gözümün önündə ana və körpəsinin üstünə düşdü. Tanıdığım bir dostumun ailəsinin 25 üzvü binanın çökməsi ilə dağıntıların altında qalaraq öldü, digər tanışımın isə 2 ailə üzvü tamamilə yox oldu”.
Təkanlardan sonra Aytəkin Malatyadan qıraqda, yük avtomobilində gecələyib. Daha sonra səfirliklə əlaqə saxlanılaraq siyahıya alınıb və Bakıya yola salınıb.
“Sadəcə əynimdəki paltar və əl çantamla vətənə döndüm. Pasportum və BDU-nun bakalavr diplomum orada qaldı. Ürəyim yenə Malatya üçün çırpınır. Ora mənim doğma şəhərimdir və mütləq geri dönəcəyəm”, - deyə Aytəkin əlavə etdi.
