Abşeron rayonunda oğluna iş axtaran qadın dələduzluqla üzləşib.
1986-cı il təvəllüdlü Ramil Səfərov tanışı Murad Abbasovun (adlar şərtidir) iş axtardığını bilərək onu mühafizəçi kimi işə düzəldəcəyini vəd edib. O, işə qəbul üçün 1600 manat, əlavə olaraq isə 600 manat paltar pulu lazım olduğunu deyib. Daha sonra Muradın anası Gülşənlə də danışaraq eyni vədi verib.
Ramil Xırdalan şəhəri, Gənclər şəhərciyində Muraddan 2200 manat alıb və işi 1-2 ay ərzində həll edəcəyini bildirib. Lakin sonradan Muradın turnikdə tələb olunan göstəricini verə bilmədiyi üçün işə götürülmədiyi məlum olub.
Ramil ifadəsində 600 manatı avtomobilinin təmirinə xərclədiyini, qalan 1600 manatı isə 2025-ci ilin avqustunda Gülşənin kart hesabına qaytardığını bildirib. O, əməlinə görə peşman olduğunu və zərəri ödədiyini deyib.
Abşeron Rayon Məhkəməsinin hökmü ilə Ramil barəsində amnistiya aktı tətbiq edilərək cinayət məsuliyyətindən azad olunub. Cinayət işi üzrə icraata xitam verilib, həbs qətimkan tədbiri ləğv olunaraq o, məhkəmə zalından azadlığa buraxılıb.
mənbə: demokrat.az
