Bakıda bəzi fəvvarələr sərinlik üçün quraşdırılsa da, məqsədinə uyğun istifadə olunmur. Bu haqda 8 iyun tarixində ATV telekanalı reportaj hazırlayıb.
Paytaxtın müxtəlif ərazilərində inşa edilən fəvvarələrin ətrafında nəinki istirahət etmək, hətta oturmaq mümkün deyil. Bəzi fəvvarələrdə sular təmizlənmədiyi üçün ətrafda antisanitar vəziyyət yaranıb. Ətrafda uçan ağcaqanadlar isə parkda istirahət edən insanları narahat edir.
Sakinlər fəvvarələrin isti günlərdə bu vəziyyətdə olmasından şikayətçidirlər.
Bunlardan biri metronun Əcəmi stansiyasının yaxınlığındakı Cavad Xan parkında yerləşir. Parkın nəzarətçisi bir müddət sonra fontanı işə salsa da, ətrafa xoşagəlməz qoxu yayılıb.
Daha sonra parkdakı vəziyyətlə bağlı Nəsimi Rayon 31 saylı Mənzil Kommunal İstismar Sahəsinin rəisi Vidadi Həsənov bildirib ki, su artıq təmizlənib, gücləndirici mühərriklərdə isə 2 gün idi ki, təmir işləri aparılırdı:
“Həmin fontan gündəlik nəzarətimizdə saxlanılır, suyu tez-tez dəyişdirilir, axşamlar sakinlərin istirahəti zamanı işə salınır”.
“Koroğlu” parkındakı fəvvarədə isə bir damcı belə olsun su yoxdur. Xətai rayonu ərazisindəki fəvarrədə də antisanitar vəziyyət baş alıb gedir. Sakinlər tərəfindən içinə zibillər atıldığından, fəvvarə zibilxanaya çevrilib.
“Koroğlu” parkı ilə bağlı Nəsimi rayonu Mənzil Kommunal Təsərrüfatı Birliyi, rayon İcra Hakimiyyəti və Fəvvarələrin İstismarı İdarəsi fontanın onların balansında olmadığını bildiriblər.
Xətai rayon İcra Hakimiyyəti isə bildirib ki, ərazidə mütəmadi olaraq təmizlik işləri aparılır və ora daim nəzarətdədir.
[URIS id=47829]
