Bakının mərkəzində, İslam Səfərli küçəsi, 12 ünvanında 1880-ci ildə tikilmiş və Azərbaycan dövləti tərəfindən qorunan memarlıq abidəsi üzərində tikilən üçüncü mərtəbə sökülür. Bu haqda bu gün, 2 iyul tarixində Qafqazinfo məlumat verib.
Bakı Şəhər İcra Hakimiyyətindən bildirilib ki, binanın sahibi tərəfindən tarixi abidədə mansard tikintisi müvafiq qurumlar tərəfindən nəzarətə götürülüb və qarşısı alınıb.
“Qanunsuz tikinti ilə bağlı sahibkara xəbərdarlıq edilib və tarixi binanın üzərində hər hansı tikintinin aparılmasının yolverilməz olduğu bildirilib. Artıq binanın damında inşa edilmiş konstruksiyaların sökülməsinə qərar verilib və söküntü işlərinə başlanılıb. Ərazi aidiyyəti qurumlar tərəfindən tam nəzarətə götürülüb”, - açıqlamada deyilir.
Tikinti barədə məlumatı daha öncə, 1 iyul tarixində memar, professor Elçin Əliyev öz Facebook səhifəsində yaymışdır. Paylaşılan fotolarda binanın damında konstruksiyaların quraşdırıldığını görsənirdi. Memarın sözlərinə görə, inşaatçılar bildirmişdir ki, bütün lazımi icazələr alınmışdır.
Yayılan şəkillər sosial şəbəkələrdə müzakirələrə səbəb olub.
[URIS id=50787]
