Səhiyyə Nazirliyinin balansında olan Xətai Rayonu Gigiyena və Epidemiologiya Mərkəzinin eyvanı qəzalı vəziyyətə düşüb. Binanın divarlarında da çatlar yaranıb. Bu haqda bu gün, 2 dekabr tarixində Bakuplus.az Bizim.Media-ya istinadən məlumat verir.
Bu günlərdə Sumqayıtda 2 saylı Ailə Sağlamlığı Mərkəzinin (ASM) eyvanı uçub və xoşbəxtlikdən müayinəyə gələn vətəndaş dağıntılar altında qalmaqdan son anda xilas olub. Bu səbəbdən daha bir tibb müəssisəsinin eyvanının qəzalı olması vətəndaşlar arasında müzakirələrə və narahatlığa səbəb olur.
Səhiyyə Nazirliyinin İctimaiyyətlə Əlaqələr sektorunun müdiri Elvin Hacıyev bildirib ki, Gigiyena və Epidemiologiya Mərkəzinin Bakı şəhəri və Respublikanın digər regionlarda yerləşən şöbələrinin binalarının texniki vəziyyəti ilə bağlı Nazirlik məlumatlıdır. Bakı şəhəri və digər regionlarda yerləşən şöbələrin əsaslı təmiri artıq investisiya planına salınıb. Bununla əlaqədar müvafiq vəsaitin ayrılması üçün aidiyyəti dövlət qurumlarına müraciət edilib. Maliyyə vəsaiti ayrıldığı təqdirdə binaların əsaslı təmiri həyata keçiriləcək.
