Bakıda və ölkə ərazisində avtobus sürücülərinin təqsiri ucbatından baş verən qəzaların sayı açıqlanıb. Bu haqda bu gün, 22 noyabr tarixində Bakuplus.az Xəzər Xəbər-ə istinadən məlumat verir.
Baş Dövlət Yol Polisi İdarəsindən verilən məlumata görə, cari ilin 9 ayı ərzində paytaxt və ölkə ərazisində avtobusların iştirakı ilə 1806 yol qəzası qeydə alınıb. Hadisələr nəticəsində 17 nəfər vəfat edib.
DYP-nin əməkdaşı Elvin Haciyevin sözlərinə görə, qəzaların əksəriyyətinin səbəbi nəqliyyat vasitələrinin köhnə və texniki-təhlükəsizlik baxımından yararsız olmasıdır. Həmçinin son vaxtlar avtobus və mikroavtobus sürücülərinin tez-tez yol qəzalarında günahkar olması müşahidə edilir.
E.Haciyev əlavə edib ki, araşdırmalar zamanı Bakıətrafı kənd və qəsəbələrdə fəaliyyət göstərən avtobuslar qeyri-qanuni yollarla texniki baxışdan yayınır.
Əgər bu kimi qanun pozuntuları aşkar olunarsa, sürücülər və sərnişindaşıma şirkətləri barəsində ciddi tənbeh tədbirləri görüləcək.
