Hədə-qorxuya görə həbsdə olan Təranə Səmədova və onun tanışı Rasim Həsənovun cinayət işi üzrə məhkəmə istintaqı yekunlaşıb. Bu haqda bu gün, 19 yanvar tarixində Bakuplus.az Report-a istinadən məlumat verir.
Proses Bakı Ağır Cinayətlər Məhkəməsinin hakimi Səbinə Məmmədzadənin sədrliyi ilə keçirilib. Prokuror Ziya Mansurov Təranə Səmədovanın 7 il 6 ay müddətinə, Rasim Həsənovun isə 8 il 6 ay müddətinə azadlıqdan məhrum edilmələrini istəyib.
Səmədova və Həsənov son sözə hazır olmadıqları üçün məhkəmədən vaxt istəyiblər.
İstintaq zamanı müəyyən olunub ki, Səmədova qeyri-rəsmi ər-arvad kimi yaşadığı Həsənovla birgə Altay Səfirovun (ad, soyad şərtidir) fotoşəkillərini əldə ediblər. Daha sonra həmin şəkilləri Altayın ailə üzvlərinə göstərməklə, yaşadığı məhəllədə yaymaqla, o, cümlədən İnstagram-da və digər sosial şəbəkələrdə yerləşdirməklə hədələyiblər. Təqsirləndirilən şəxslər Altaydan 3000 manat pul tələb ediblər, və ondan ötən ilin noyabrında 1100 ABŞ dolları məbləğində pulu hədə-qorxu ilə tələb edərək ələ keçiriblər.
Səmədova və Həsənov barəsində “Hədə-qorxu ilə tələb etmə, qabaqcadan əlbir olan bir qrup şəxs tərəfindən törədildikdə” maddələri ilə ittiham irəli sürülüb, məhkəmənin qərarı ilə həbs qətimkan tədbiri seçilib.
