Bakının Pirallahı rayonunda 1982-ci il təvəllüdlü Həsən birgə yaşadığı Turanə ilə yaranan mübahisə zamanı ona xəsarət yetirib. Hadisə cütlüyün yaşadığı evdə baş verib.
Demokrat.az xəbər verir ki, Həsənin əvvəlki evliliyindən olan övladları ilə mütəmadi görüşməsi Turanənin narazılığına səbəb olub. Hadisə günü, səhər saatlarında Turanə Həsənin uşaqları ilə görüşməsini ona irad tutub və bu məsələ tərəflər arasında gərginliyə yol açıb.
Nəticədə aralarında mübahisə yaranıb. Mübahisə zamanı əvvəlcə Həsən qadını döyüb, Turanə isə onu söyməyə başlayıb. Bundan sonra kişi qadının üz nahiyəsinə yumruqla zərbə endirib.
Faktla bağlı Həsən Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham olunub. O, ifadəsində hadisəni etiraf edib və bildirib ki, münaqişə məhz uşaqları ilə görüşməsi məsələsi üzündən baş verib. Cinayət işinə Pirallahı Rayon Məhkəməsində baxılıb.
Məhkəmədə təqsirləndirilən şəxsin zərərçəkənlə barışıq əldə etdiyi, Turanənin ona qarşı şikayətini geri götürdüyü məlum olub. Bu əsasla cinayət təqibinə xitam verilib və Həsən cinayət məsuliyyətindən azad edilib.
