Şuşaya şəxsi avtomobillə getmək mümkün olacaq. Bu haqda bu gün, 23 dekabr tarixində Bakuplus.az Yerüstü Nəqliyyat Agentliyinə istinadən xəbər verir.
Azərbaycan vətəndaşlarının və xarici turistlərin işğaldan azad edilmiş ərazilərə səfərləri asanlaşdırılır.
Belə ki, Şuşa şəhərinə və Suqovuşan qəsəbəsinə fərdi minik avtomobilləri ilə də səfər etmək mümkün olacaq. Vətəndaşlar səfər üçün icazələri 27 dekabr tarixindən etibarən “Yolumuz Qarabağa” portalı (www.yolumuzqarabaga.az) üzərindən əldə edə bilərlər.
Səfərə getmək üçün sürücü də daxil olmaqla maksimum 9 oturacaq yeri olan minik avtomobilləri qəbul olunur. İcazələrin etibarlılıq müddəti Şuşa şəhəri üçün 2 gün, Suqovuşan qəsəbəsi üçün isə 1 gün olacaq.
Gün ərzində Şuşaya 80, Suqovuşana isə 60 minik avtomobilinin səfər etməsinə icazə verilməsi nəzərdə tutulur.
Vətəndaşlar marşrut trayektoriyasından kənara çıxmamalı, səfər marşrutu boyunca dayanmadan son məntəqəyə qədər nəqliyyat vasitəsini idarə etməlidirlər. Səfərdən öncə portalda yerləşdirilmiş mehmanxanalarla əlaqə saxlayıb otaq sifarişlərini həyata keçirmək olar.
Turist turlarında isə bundan sonra xarici vətəndaşların da iştirakına şərait yaradılır və turlarda iştirak üçün yerli və xarici turistlər istənilən turizm şirkətinə müraciət edə bilərlər.
