Qatar vurması nəticəsində iki nəfərin ölməsi hadisəsi barədə Azərbaycan Dəmir Yolları QSC-nin mətbuat xidməti məlumat yayıb. Məlumatda bildirilir: “Dünən saat 22:15-də ADY-yə məxsus elektrovoz Qobustan-Səngəçal istiqamətində hərəkət edərkən iki nəfər şəxs qəfil qatarın qarşısına çıxıb. Maşinist tərəfindən təcili tormozlama aparılsa da, məsafə az olduğundan hadisə qaçılmaz olub.
Təəssüf hissi ilə bildiririk ki, stansiya əməkdaşları tərəfindən hadisə yerinə dərhal təcili yardım briqadası çağırılsa da, hər iki şəxs aldıqları ağır bədən xəsarətlərindən dünyasını dəyişib.
Hər iki şəxsin ailəsinə dərin hüznlə başsağlığı veririk. Allah rəhmət eləsin!
ADY bir daha insanlara çağırış edərək onları dəmir yolu xətlərini yalnız müəyyən edilmiş yer və piyada keçidlərindən istifadə etməklə keçməyi, məhdudiyyətli görünmə şəraitində, habelə sutkanın qaranlıq vaxtı xüsusilə ehtiyatlı olmağı, yolu keçərkən diqqəti yayındıran hərəkətlərdən, o cümlədən mobil telefon, yaxud qulaqcıqdan istifadə etməkdən çəkinməyi ciddi tövsiyə edir”.
***
Ötən gün dəmir yolu xəttində piyadaların vurulması ilə nəticələnən qəza baş verib.
BakuPlus.az-ın əldə etdiyi məlumata görə, hadisə 22 radələrində Qaradağ rayonu ərazisində qeydə alınıb.
Qəza zamanı 1995-ci il təvəllüdlü E.Fərzəliyev və 2007-ci il təvəllüdlü S.Zərbəliyev hərəkətdə olan qatarın altında qalaraq aldıqları xəsarətlərdən hadisə yerində həyatlarını itiriblər.
Qəza ilə bağlı Dəmiryolu Nəqliyyatında Polis İdarəsində araşdırma aparılır.
Nəzrin Vahid
