Abşeron rayonunda 50 yaşlı kişi qeyri-rəsmi münasibətdə olduğu qadına xəsarət yetirib.
Demokrat.az xəbər verir ki, hadisə ötən ilin iyulun 11-də baş verib. 1976-cı il təvəllüdlü Əfsun həmin gün yaşadığı fərdi yaşayış evinin həyətində yüngül dərəcəli alkoqol sərxoşluğu vəziyyətində olarkən qeyri-rəsmi ər-arvad münasibətində olduğu tanışı Elmira (adlar şərtidir – red.) ilə mübahisə edib. Buna səbəb onların həmin münasibətdən olan 2021-ci il təvəllüdlü övladlarının qohumlarından biri tərəfindən nadinclik etməsini bildirməsi olub. Bundan əsəbiləşən ər ilə arvad arasında mübahisə yaranıb. Nəticədə Əfsun Elmiranın üzərinə hücum edib. O əvvəlcə qadına yumruq zərbələri endirib. Elmira zərbələrin təsirindən yerə yıxılıb. Bu zaman təqsirləndirilən şəxs yerdə yıxılmış vəziyyətdə olan arvadına təpik zərbələri vurub.
Hadisəni törədən Əfsunun barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib.
İş baxılması üçün Abşeron Rayon Məhkəməsinə göndərilib. Məhkəmə araşdırması zamanı məlum olub ki, təqsirləndirilən şəxs zərərçəkənlə barışıq əldə edib. Bu səbəbdən də qadın ərinə qarşı şikayətini geri götürüb.
Bu səbəbdən məhkəmə təqsirləndirilən şəxsin barəsində olan cinayət təqibinə xitam verib. O, cinayət məsuliyyətindən azad edilib.
