Sosial şəbəkələrdə onlayn qumar oyunları təşkil edən mütəşəkkil dəstənin cinayət işi üzrə məhkəmə prosesi keçirilib.
Teleqraf.az xəbər verir ki, bu gün Bakı Ağır Cinayətlər Məhkəməsində hakim Nigar İmanovanın sədrlik etdiyi prosesdə ittiham aktı elan olunub.
Rəsmi məlumata görə, şəbəkə üzvləri gizliliyi təmin etmək məqsədilə əsasən Rusiya, Gürcüstan, Ukrayna kimi ölkələrə məxsus mobil nömrələrdən istifadə edərək sosial şəbəkələrdə çoxsaylı səhifələr açıblar. Daha sonra həmin səhifələr vasitəsilə vətəndaşları qumar oyunlarına cəlb ediblər.
"Fast Loto", "CHCPlay", "MostBet" kimi qeyri-leqal saytlara birbaşa adminlik statusu əldə edən şəbəkənin əsas üzvləri ölkə ərazisində virtual idarəetmə sistemi quraraq kirayə götürdükləri mənzillərdə dəstə başçılarının tapşırıqları əsasında fəaliyyət göstəriblər.
Araşdırmalarla məlum olub ki, müxtəlif yollarla cinayətkar şəbəkəylə əməkdaşlığa cəlb edilən şəxslərin sayı 40-dan artıqdır.
Təqsirləndirilən Elçin Quliyev cinayət yolu ilə əldə etdiyi külli miqdarda pul vəsaitini leqal dövriyyəyə daxil etmək üçün çirkli pulların yuyulmasını həyata keçirərək özünün və yaxın qohumlarının adına heç bir fəaliyyəti olmayan şirkətlər açıb.
O, iş adamı görüntüsü yaratmaq məqsədi ilə mütəmadi olaraq xarici ölkələrə, xüsusən Gürcüstana səfərlər edib. Həmçinin qanunsuz qumar oyunları təşkil edən transmilli cinayətkar dəstənin başçıları ilə onun dəfələrlə xarici ölkələrdə görüşlər keçirdiyui, yeni kiber sistemləri Azərbaycana gətirmək üçün gizli sövdələşmələr apardığı da məlum olub.
Şəbəkə üzvlərinin qanunsuz yolla əldə etdikləri vəsaitlə aldıqları mənzillər, torpaq sahələri, bağ evləri, ticarət obyektləri və lüks avtomobillər müəyyən edilərək məhkəmə qərarları ilə üzərlərinə həbs qoyulub.
Başqa məhkəmə proseslərinə görə ittiham aktının oxunuşu yarımçıq qalıb.
Növbəti məhkəmə oktyabrın 27-nə təyin edilib.
Qeyd edək ki, cinayət işi üzrə təqsirli bilinən 12 nəfər - Elçin Quliyev, Orxan Məmmədov, Nurlan Hüseynov, Elvin Balakişiyev, Taleh Ələkbərov, Hüseyn Quliyev, Nurlan Məmmədov, Zeynal Abbaslı, Royal Hüseynov, Səid Balakışıyev, Pərvan Məmmədov və Pəsi Yusubov Daxili İşlər Nazirliyinin Kibercinayətkarlıqla Mübarizə Baş İdarəsi tərəfindən saxlanılıblar.
