Bakıda ailəvi restoran qarət olunub.
Hadisə rayonu, Hüseyn Seyidzadə küçəsində yerləşən restoranlardan birində qeydə alınıb.
42 yaşlı Zöhrab Mütəllimov (şərti adla) gecə saatlarında iaşə obyektinin pəncərəsindən qanunsuz içəri daxil olub. Bundan sonra restoranının 600 manat dəyərində 1 ədəd samovarını, 154 manat dəyərində 7 kiloqram quzu ətini, 90 manat dəyərində 5 kiloqram mal ətini, 88 manat dəyərində 8 kiloqram kənd toyuğunu, 90 manat dəyərində 2 kiloqram "Beluqa" balığını, hazır şişdə olan 88 manat dəyərində 4 kiloqram farş ətini, 140 manat dəyərində 7 ədəd "Banketnaya" markalı arağı və 20 manat dəyərində 10 ədəd "Duşes" şirin suyunu oğurlayıb. Bütün bu qida məhsullarını isə öz velosipedi ilə daşıyıb.
Faktla bağlı Zöhrab Mütəllimov saxlanılıb və barəsində cinayət işi başlanıb.
O, ifadəsində bildirib ki, oğurladığı ərzaq məshullarını və spirtli içkiləri Bakı şəhərində müxtəlif yerlərdə istifadə edib, bəzilərini isə küçələrdə yaşayan kimsəsiz şəxslərə istifadə etməsi üçün pay verib:
"Samovarı isə 42 manat 50 qəpiyə Nəsimi rayonu, 3-cü mikrorayon ərazisində metal qəbul edən yerə satmışam. Samovarın özümə məxsus olduğunu demişdim. Onun pulunu şəxsi ehtiyaclarım üçün xərcləmişəm".
Zərərçəkən qismində ifadə verən restoranın icarədarı hadisə nəticəsində ona 1270 manat məbləğində ziyan vurulduğunu deyib. O, dəymiş ziyandan yalnız samovarın qaytarıldığın və digər zərərin ödənilmədiyini bildirərək, şikayətçi olduğunu və təqsirləndirilən şəxsə ədalətli cəza verilməsini xahiş edib.
Məhkəmənin qərarı ilə Zöhrab Mütəllimov 2 il müddətinə azadlıqdan məhrum edilib.
Mənbə: lent az
