İçərişəhərin tarixi binalarına avtomobillərin daxil olması qadağan ediləcək. Bu, Bakının 2040-cı ilədək inkişafına dair Baş planında qeyd olunub. Bu haqda bu gün, 8 yanvar tarixində Bakuplus.az məlumat verir.
İçərişəhərə bitişik yerləşən (şərq hissədə) 19-cu əsrə aid tarixi binaların olduğu şəhər ərazisinin (Neftçilər prospektinin şimalı və Bülbül prospektinin qərbi ilə) avtomobil nəqliyyatından azad sakit şəhər ərazisinə çevrilməsi (Bülbül prospekti, Səməd Vurğun küçəsi, Zərifə Əliyeva küçəsi, Neftçilər prospekti kimi əsas yolları dolanaraq) nəzərdə tutulur. Mərkəzi ərazilərdə avtomobil yollarında sürət həddinin 2027-ci ilədək 50 km/saat, 2040-cı ilədək 30 km/saat müəyyən edilməsi nəzərdə tutulub.
Piyada zonasının İçərişəhər ərazisi ilə (nəqliyyat vasitələrinin giriş-çıxışına məhdud səviyyədə yol verilən) birləşdirilməsi və Əziz Əliyev küçəsi ilə İstiqlaliyyət küçəsi arasında ümumi ayırıcı xəttin müəyyən edilməsi ilə Neftçilər prospekti ilə Nizami Parkı arasında avtomobil nəqliyyatından azad sakit ərazinin yaradılması planlaşdırılır.
Yaxınlıqdakı yerli əhəmiyyətli yolların avtomobil nəqliyyatından azad sakit küçələr kimi inkişaf etdirilməsi ilə Dövlət İncəsənət Muzeyi Parkı (keçmiş Qubernator bağı) və Dağüstü park (Funikulyorətrafı ərazilər daxil olmaqla) kimi turizm məkanlarının İçərişəhərlə əlaqələndirilməsi və Niyazi küçəsində piyada keçid imkanlarının tamamlanması da plana daxildir.
Paytaxtımızın yeni Baş Planı barədə ətraflı məlumatı Dövlət Şəhərsalma və Arxitektura Komitəsinin saytında izləmək mümkündür.
